మూడోవేవ్ కాదది మూడోనేత్రం
ఓసీ ! కరోనా రాక్షసీ! ఎంతటి కరుణలేని కౄరమృగానివే? ఎంతటి వికృత చేష్టలేనీవి? విశిష్ట అతిథిలా వస్తావ్
విషపు నవ్వునవ్వుతావ్ ఆకలి ఆకలంటావ్
అర్థాంతరంగా కోట్లున్న కోటీశ్వరులనేమి
కూటికిలేని కడునిరుపేదలనేమి రాత్రికిరాత్రే
మాయం చేస్తావ్ నిర్దాక్షిణ్యంగా కాటికీడుస్తావ్
అందరి ఆశలను సమాధి చేస్తావ్
కన్న కమ్మని కలల్ని కాల్చి బూడిదచేస్తావ్
రక్తసంబంధాలను నిర్దాక్షిణ్యంగా రద్దుచేస్తావ్
ఓసీ ! కరోనా రాక్షసీ ! ఎంతటి దయలేనిదానవే !
చూడు అటుచూడు తమకు అంత్యక్రియలు
జరగనందుకు ఐనవారికి కడచూపు దక్కనందుకు
కాటిలోని శవాలు సైతం కన్నీరుపెడుతున్నాయి
ఓసీ ! కరోనా రాక్షసీ ! ఎంత పని చేశావో !
చూడు అటుచూడు ధనదాహం తీరని
నరరూప రాక్షసుల చీకటి వ్యాపారాలతో
ధర్మాసుపత్రులు సైతం స్మశానాలౌతున్నాయి
ఓసీ ! కరుణలేని కరోనా రాక్షసి !
ఓసీ మాయదారి మహమ్మారి !
మళ్ళీ మూడో అవతారమా ?
విశ్వంలో విహారయాత్రా ?
మానవాళిపై దండయాత్రా ?
ఈసారి వ్యాక్సిన్ తో పాడెకట్టి
చేస్తాం నీకు తప్పక శవయాత్ర
ఔను కరోనా మూడవ అవతారమంటే
ముమ్మాటికది మృత్యువు అవతారమే !
వికృత చేష్టలతో విలయతాండవమే !
కరోనా మూడో వేవంటే మూడో నేత్రం తెరిచినట్టే !
సునామిలా వచ్చినట్టే తస్మాత్ జాగ్రత్త !
అందుకే ముందు జాగ్రత్తలు తీసుకుందాం!
తక్షణమే వ్యాక్సిన్ వేసుకుందాం !
ఇమ్యూనిటీని పెంచుకుందాం! బాహుబలులమై
కరోనా ముప్పును తప్పించుకుందాం !
రచన. పోలయ్య కవి కూకట్లపల్లి
అత్తాపూర్ హైదరాబాద్...9110784502