నేడే తెలిసింది ఒక నిండునిజం ...
పాముతో కలిసి
వేడివేడి పాలు త్రాగాలని
పాము పడగ నీడన
ప్రశాంతంగా పవళించాలని
కమ్మని కలలు గనే
ఆ అమాయకపు కప్పలకు
తెలియదు పాపం ఒక పచ్చినిజం
తమకు ప్రాణగండమున్నదని
తమకు పాముకు బద్దవైరమని
తాము పాములకు ఆహారమని
ఆ అమాయకపు కప్పలకు
తెలియదు పాపం ఒక పచ్చినిజం
కప్పలు పదివేలు ఏకమైనా
ఒక్కపామునైనా సంహరించలేవని
చీమలు కూడా పాములకు శతృవులను
ముల్లును ముల్లుతోనే తియ్యాలను
ఆ అమాయకపు కప్పలకు
తెలియదు పాపం ఒక పచ్చినిజం
కసిపట్టి బుసలు కొట్టే కోడెనాగుల
విషపు కోరల నుండి
విముక్తి లభించాలంటే
కప్పలన్నీ చలిచీమల సహకారం
తప్పక తీసుకోవలసిందేనని
ఆ అమాయకపు కప్పలకు
నేడే తెలిసింది ఒక నిండునిజం
రచన. పోలయ్య కవి కూకట్లపల్లి
అత్తాపూర్ హైదరాబాద్... 9120784502
Post a Comment