Pravahini - The Channel of Telugu Literature and Culture - eMagazine ప్రవాహిని

సంచిక:1 సంపుటి:5 ప్రవాహిని - ఆగస్ట్, 2021

ప్రవాహిని - అంతర్జాల సాహిత్య పత్రికలో మీ రచనలు ప్రచురించుట కొరకు

రచనలు పంపాల్సిన మెయిల్ ఐడి కై పూర్తి వివరాలతో పాటు మీ రచన జతచేసి ఈ కింది నెంబర్ లో వాట్సాప్ ద్వారా సంప్రదించగలరు.

6302324734 (WhatsApp Only)

హల్లో! సీనియర్ సిటిజన్స్

కాలచక్రం తిరుగుతూ

నిన్నటి యవ్వన మాధుర్యనుండి

ముందుకు నడిపింపింది

మన యవ్వనం ఎక్కడకు పోలేదు

మన అబ్బాయిలకో అమ్మాయిలకో

వారి అబ్బాయిలకో అమ్మాయిలకో ఇచ్చింది

అందువల్ల ఏదో పోయిందనే బాధ వద్దు

శరీరం పని చేసి పని చేసి అలసిపోయింది

కాస్త విరామం అవసరం

క్రమంగా విరామ జీవితం గడపాలి

అజమాయిషీలు తగ్గించుకొని

ప్రకృతిని ఆస్వాదించడం మంచిది

మన పెరటిలో చెట్లను చూడండి

పండుటాకులను వదలించుకుంది

పరిమళం ఇచ్చే పూలను చూడండి

ఉదయం ఎంతో అందంగా ఉంటాయి

సాయంకాలానికి వాడి పోతాయి

అయినా విచారించవు

కొత్త పూలకు అవకాశం ఇస్తాయి

చివరి వరకూ ఇహపర బంధాలతో

ముడి పడక,

ఆధ్యాత్మిక చింతన,

సంగీత సాహిత్యాలపై అభిరుచితో గడుపుదాం

"తన కోపమె తన శత్రువు,

తన శాంతమె తనకు రక్ష, దయ చుట్టంబౌ

తన సంతోషమె స్వర్గము,

తన దుఃఖమె నరక మండ్రు తథ్యము సుమతి!"

అన్న సూత్రాలను ఆచరిద్దాం

స్నేహితులతో గడపడం

ఎంతో ప్రశాంతత ఇస్తుంది

కనీసం ఫోన్ లో తరచు హల్లో చెప్పండి,

మరీ ఏదోచేయాలని తపన ఎక్కువ ఉంటే

మీ జీవితం ఎలాగడిచింది

సింహావలోకనం చేసుకుంటూ

ఓ ఆటో బయగ్రఫీ రాయండి

మీ వారసులకు ఉపయోగపడుతుంది

కడుజాగ్రత్తగా శేష జీవితం గడుపుతూ,

సాగి పోదాం చీకు చింతా లేకుండ

సీనియర్ సిటిజన్స్ దినోత్సవం సందర్భంగా అందరికీ శుభాకాంక్షలు

-డా వి.డి.రాజగోపాల్,

9505690690.

నా భారతం! కొన్ని మెరుపులు, కొన్ని మరకలు!

నా భారతం ఒక అత్యుత్తమ సంస్కారానికి నెలవు. అహింస, సత్యం, ధర్మం, క్షమ వంటి వేళ్ళు ఈ భువిలో సుస్థిరం గా లోలోతులకు పాతుకుపోయాయి. జాలి,దయ,దానగుణాలతో పాటు ‘సర్వేజనాః సుఖినో భవంతు’ వంటి అత్యున్నత ఆదర్శాలకు కొలువు.

‘మానవ జీవితానికి కుటుంబం ఊయల వంటిది’ అంటాడు సుప్రసిద్ధ గ్రీకు తత్వవేత్త అరిస్టాటిల్. అటువంటి ఉమ్మడి కుటుంబ వ్యవస్థలో ఒకప్పుడు ఎన్నో నీతికథలు,శతకాలు,నైతిక.విలువలు నేర్పడంజరిగేది. చక్కని సాంస్కృతిక కార్యక్రమాలు, యక్షగానాలు, హరికథలు, బుర్రకథలు,నాటకాలు అలరించి ఆనంద పరచేవి. సమాజానికిచెప్పాల్సిన నీతి బోధలు, ఉద్యమాలు హృద్యంగాచెప్పబడేవి. పెద్దలంటే గౌరవం, చిన్నలంటే అభిమానం, పరస్పర ఆదరాభిమానాలు ఉండేవి. వ్యవసాయ ప్రధానదేశం కాబట్టి స్వాతంత్ర్యానంతరం ప్రణాళికా బద్ధంగా పరిశ్రమలు, వాణిజ్య సంబంధిత ఎగుమతులు, దిగుమతులు కొన్నిజరిగాయి. ఆర్థికాభివృద్ధి తోపాటు విదేశీ మారక ద్రవ్యం లభించింది. జనాభా పెరిగింది. నిరుద్యోగం, చిరుద్యోగ సమస్య పెరిగింది. స్వార్థం, లంచగొండితనం, ఆశ్రితపక్షపాతం పెరిగాయి. కుల మత వైషమ్యాలు, అంటరానితనం, మహిళలపై వివక్ష అక్కడక్కడా ఇప్పటికీ పడగలు విప్పుతున్నాయి. ‘సాధించిన దానికి సంతృప్తిని పొంది అదే విజయమనుకుంటే పొరపాటోయి’ అంటాడు శ్రీ శ్రీ. అమ్మాయిలు అంతరిక్షం వరకూ వెళ్ళారు. అది చాలదన్నట్లు ఆకాశంలోనూ సగభాగమయ్యారు. అన్ని రంగాలలో అభివృద్ధి సాధించారు. నవకల్పనలు, సరళీకృత ఆర్థిక విధానాలు ఒక పక్క, దేవాలయ విగ్రహ ధ్వంసాలు, కుంభకోణాలు, కుల గజ్జి మరోప్రక్క నెలకొన్నాయి. రాజకీయ హత్యలు, రైతుల ఆత్మ హత్యలు, మానభంగాలు, అనైతిక కార్యకలాపాలు జరుగుతూనే ఉన్నాయి.

నా భారతి చెదరని చిరునవ్వుతో క్షితి నుండి క్షిపణి వరకు కాంతి కిరణమై దూసుకు పోతుంటే, మోయలేని బరువు తో పుస్తకాలు వీపు పై వేసుకున్న పాపాయి గుర్తొస్తుంది. ఆ శుష్క హాసం గుండెను చురుక్కుమనిపిస్తుంది. ఐక్యరాజ్య సమితికి యోగా భిక్ష బెట్టి, ప్రపంచానికే కరోనా మందును పంపిన స్థాయి మనదని ఆనంద పడాలో, నిత్యం జరిగే దారుణాలు చూసి కుమిలి పోవాలో తెలియని మానసిక స్థితిమనది. వేదాలకు, ఇతిహాసాలకు, ఆర్ష ధర్మానికి ప్రతీక యైన రాముడు, బుద్ధుడు పుట్టిన దేశమని గర్విద్దామా!? కూటికి, గుడ్డకు కూడా కరువైన మానవాళిని చూసిగర్హిద్దామా!? తేల్చుకోలేని పరిస్థితి! అభివృద్ధి ఆకాశం అంటింది.

పాపం కూడా కొండలా పెరిగింది. స్వార్థం పడగలు విప్పింది. ఫలితంగా హైడ్రో ప్రాజెక్టుల నిర్మాణం పర్యావరణ కాలుష్యానికి దారితీసింది. ప్రకృతి ఉత్తరా ఖండ్ వరదలు, లైలా, హుదూద్ తుఫాన్లు, భూకంపాలు, ఉప్పెనలతో పగతీర్చుకుంది. పేరు ఏదైతేనేం ప్రళయం, విధ్వంసం జరిగాయి. నోబెల్ బహుమతులతో పాటు అనేక శాస్త్ర రంగాలలో సర్జికల్ స్ట్రైక్ వంటి విషయాల్లో విజయాలు సాధించాం. ఆటలలో పతకాలు యెన్ని వున్నా నిత్యం ఎక్కడో ఒకచోట మానవత్వం మంటగలిపే దుర్ఘటనలు జరుగుతూనే ఉన్నాయి. బంధాలను మరచిన హింసలు, శాడిజం ప్రవృత్తులు బయటపడుతూనే ఉన్నాయి. నా భారత మాతకు మాత్రం తన పొగరు జూపడానికి, హైందవ కీర్తిని విదేశాలలో విహరింప జేయడానికి ఆధర్మ చక్రం, ధార్మికత చాలు. ఈ దేశం లో ప్రతివాడు పౌరుషం తో ఉరకలు వేయాలి. మన త్రివిధ దళాల సిపాయిల త్యాగాలు మాత్రమే కాదు- మన దేశభక్తి కూడా అవసరం దేశం వెలుగులు నలు దిశలా వెదజల్లేందుకు. ప్రపంచానికే మకుటాయ మానంగా వెలుగొందడానికి ఇది చాలు.

అందుకే శేషేంద్ర అంటారు ‘నేను పిడికెడు మట్టినే కానీ నాకు ఒక దేశపు జెండా కున్నంత పొగరు ఉంది’ అని. యువత ఎక్కువ వున్న దేశం మనది. అందుకే వివేకానందుడు ‘ఉక్కునరాల యువతను ఇవ్వండి. అద్భుతాలు చేస్తానం’టాడు. ఈ 75 సంవత్సరాల కాలంలో కొన్ని మెరుపులు, కొన్ని మరకలు రెండూ ఉన్నాయి. గాంధీజీ,నెహ్రూ తదితర నాయకుల విజయాలతో పాటు ఆజాద్ హింద్ ఫౌజ్ దళపతి అదృశ్యం; బాపు,ఇందిర,రాజీవ్ గాంధీల హత్యలు వంటిమరకలుకూడావున్నాయి.

‘పదండి ముందుకు పడం డి తోసుకు పోదాం! పోదాం! పైపైకి’ అని ఎవరికి వారు ప్రేరణ నిచ్చుకుంటే తప్ప నీతిగా బ తికితే తప్ప సామాన్యుడు బతికి బట్ట గట్ట లేడన్నది నిర్వివాదాంశం! నాకీ అవకాశం ఇచ్చి ప్రేరణ కలిగించిన నిర్వాహకులకు ధన్యవాదాలు తెలుపు కుంటూ...స్వస్తి!

-బి హెచ్.వి.రమాదేవి

ఎం.ఏ.,ఎం,ఏ.,ఎం.ఫిల్., ( పిహెచ్.డి)

తెలుగు లెక్చరర్, రాజమహేంద్రవరం.

చర వాణి: 6305543917.

జోహార్ జయ శంకర్

నిండు బాధలఉరిమె మేఘం

వర్షించే చిరునవ్వుల మోహం

మంచు గడ్డల కరిగే హృదయం

రగలే నిప్పు , వీచె వాయువు

జనగర్జనవై కదలే కడలి....

జై తెలంగాణ నినాదపిడుగై

మండే మంటతో ఎత్తన పిడికిలి

బడిలో గుడిలో జన సందడిలో

తెలంగాణమే ఉపిరి పాటగా రాష్ట్ర సాధనే ఉద్యమ బాటగా

అక్రందనలు ఆవేదనలు ఆఖరి మజిలి కాదంటూ...

పిడికిలి పీడియే నీ చేయి కన్నీటి తడిని తుడ్చేయ్....

అంటూ విషవృక్షాల పెకలింప విషయమేమిటో వివరించి

విశాదంలో వినయంగా విజయ శంఖమే ఆశించి

విద్యాలయల క్షేత్రంలో పొరాట మొక్కలు నాటించి

వీర కుసుమాలు పూయించి

అమరవీరుల నేత్తుటి మరకల తిలకంగా

తెలంగాణ రణరంగాన ఆత్మఘోషణై

మన అత్మీయ ఉద్యమ పితమౌహుడుగా

ప్రతివాడికి పోరాట గుత్పను అందించి

సమరశిలగ మిగిలిపోయిన ఆ బ్రహ్మచారి

ఆధిపత్యాల అణచివేతలో

అసువులు బాసిన అమర వీరుల ఊపిరివై

ఉద్యమపాఠాల మాష్టారుగా

ఆత్మాగౌరవపు పచ్చని చీరను

తెలంగాణకు కట్టాలంటూ....

కలలు గన్న సిరచుక్కతో వేగు చుక్కల

వెలుగు చూపినాడు జయ శంకర్

అమర్ హై అమర్ రహేగా !

హమారే మంజిల్ ఇ మక్సద్

జైయహై జయ జయ జయశంకర్....

-మురళీ జాదవ్, ఉపాద్యాయులు,

ఉట్నూర్ , ఆదిలాబాద్ జిల్లా, 9492539553.

వీరసైనికుడు మానవుడు

కలియుగంలో మానవుని పయనం

సుదూరమైంది సుదీర్ఘమైనది

జగత్తులో అద్భుతాలు సృష్టించే

గొప్పమేధావి ఆధునిక మానవుడు

ఆశతోను ఉన్నతాశయంతోను

బతుకుతున్న సాధారణ మానవుడు

ఆదికాలం నుండి ఆధునికకాలం వరకు

ఎన్నో ప్రకృతి వికోపాలకు గురై

దివ్యౌషధాలతో ఎదిరించి

నిలబడ్డ వీరసైనికుడు

నాడు రణరంగంలో రక్తంచిందించి

విజయంకోసం పోరాడే వీరసైనికుల్లా

నేడు కరోనారక్కసి చిమ్మే

విషపుగాలులకు బలికాకుండా

కురుక్షేత్రంలో నారాయణాస్త్రానికి

వీరులంతా అస్త్రసన్యాసం చేసినట్టు

మనవారినంతా జాగరూకతతో

నడుచుకోవాలని సూచించి

వ్యూహంతో కరోనారక్కసిని ఎదిరిస్తే

మానవుడు నిలకడగా బతుకుతాడు

-ఆచార్య ఎం.రామనాథం నాయుడు,

మైసూరు, 8762357996.

అందరూ బాగుండాలి..!

అందరూ బాగుండాలని

కోరుకుంటేనే..మనకు కూడ

మంచి జరుగుతుంది..!

పైనున్న దేవుడు చూస్తుంటాడు..

ఎవరి బుద్ధి ఎలాంటిదో నన్న విషయాన్ని కనుగొంటాడు..!

తనకు మాత్రమే మంచి కావాలి,

పరులకు చేటు కావాలనే దుర్గుణం ను

మనుష్యులు కాదు కదా దేవుడు సైతం ఒప్పుకోడు..!?

నిలువెల్లా స్వార్థం ఉండి,

ఏమాత్రం సాయం చేయని తత్వాన్ని దేవుడు హర్షించడు..!

తోటి వారి మంచి కోరి, మసలు కొనేవారినకి మాత్రమే

సుఖ శాంతులు ప్రసాదిస్తాడు..!

తను బాగుపడి,పొరుగువారు నాశనం కావాలనే వారికి

దేవుడూ తగిన శాస్తి చూపిస్తాడు..!

అందరూ బాగుండాలి,

అందులో నేనూ ఉండాలి నన్న స్పృహ ఉండాలి..!

అప్పుడే దేవుడు సంతోషిస్తాడు..! వరాలు కురిపిస్తాడు..!??

-విన్నర్-ముహమ్మద్ ముస్తఖీమ్,

కొల్లాపూర్, నాగర్ కర్నూల్ జిల్లా, తెలంగాణ.

తెలంగాణ పితామహుడు

అతని మాటల మమకారాన్ని జూసిన

తెలంగాణ నేలతల్లి మురిసిపోయెనెంతగానో...

అతడు నడిచిన దారుల్లో ఎగిసిపడిన ధూళి

నవచైతన్యపు బలాన్ని పుంజుకుని..

కెంజాయి వర్ణంలో కొట్టిన కేరింతలెన్నో ..

వనరులెన్నో మాకున్నాయ్..

మా అధికారం మాక్కావాలంటూ..

ఉద్యమానికి గొంతెత్తి గల్లీల నుంచి ఢిల్లీయే కాదు

ఖండాంతరాలదాకా వినిపించిన తెలంగాణ సిద్దాంతకర్త గొంతుకది..

పోరాట పఠిమనెంతో గలిగి

నిత్యశోధనలతో నిరంతర విద్యార్థియై..

విశాలాంధ్రను ఎండగట్టిన ధీశాలి ఆజన్మంతపు బ్రహ్మచారినే..

తెలంగాణోద్యమానికంకితమై నవయుగ భీష్ముడిగా నిలిచిన మేథావి..

బహుభాషా సంపన్నుడు మాత్రమే కాదు మేటి గుణసంపన్నుడు కూడా...

మార్గదర్శక సలహాలనందించి..

మేలైన దారులలో పాలకులను సైతం నడిపిన తెలంగాణ పితామహుడు..

కమ్ముకున్న కారుచీకట్లను తరిమి

తల్లడిల్లుతున్న తల్లిని కాపాడాలని

వదలని అభ్యుదయవాదాన్ని భుజానేసుకుని..

కలలు కన్న తెలంగాణాను

కండ్లారా చూడాలంటూనే..

తీరని కలతో కండ్లు మూసిన మహనీయుడు

నేటికీ ఎప్పటికీ ప్రజల గుండెల్లో పదిలమై నిలిచిన..

మహోన్నత తేజోమూర్తుడు మన ఆచార్య జయశంకరుడు..

-శ్రీలతరమేశ్ గోస్కుల

హుజురాబాద్.

అపకారికి ఉపకారం...!

_కొంపెల్లి రామయ్య (యామిని తేజశ్రీ)ఖమ్మం

అనగనగా ఓ కుందేలు పిల్ల. అది తోవ తప్పింది. వెళుతూ వెళుతూ సింహ గుహలోకి వెళ్ళిపోయింది. నిద్రపోతున్న సింహంపైకెక్కి జూలు పట్టుకొని ఆడుకోవడం ప్రారంభించింది. సింహానికి మెళుకువ వచ్చింది. కోపం వచ్చింది కూడా. చిన్నపిల్ల దీనికేం తెలుస్తుంది పాపం. సింహానికి జాలేసింది.

ఎలాగైనా వాళ్ళమ్మ దగ్గరకు చేర్చాలనుకొంది. అంతలోనే అటుగా వచ్చిన నక్కను పిలిచి "ఓయ్ నక్కా! ఇలారా! ఈ కుందేలు పిల్ల తప్పిపోయి ఇలా వచ్చింది. దీన్ని వాళ్ళమ్మ దగ్గరకు చేర్చు" అంటూ ఆజ్ఞ జారి చేసింది. దానికి నక్క "సరే సింహం రాజా! మీ ఆజ్ఞను శిరసావహించి ఈ చిట్టి కుందేలును తన తల్లి దగ్గరకు చేరుస్తాను" అంటూ అక్కడి నుండి కుందేలు పిల్లతో బయలు దేరింది నక్క.

మార్గ మధ్యలో నక్కకు ఓ పాడు బుద్ధి పుట్టి "ఈ పూటకు నేను ఆహారం కోసం వెతుక్కోవాల్సి న పని లేదు ఈ కుందేలు పిల్లను తింటే సరి పోతుంది కదా!" అనుకుంటూ బయలు దేరింది. మార్గ మధ్యలో చిట్టి కుందేలును చంపి తినడానికి ప్రయత్నించింది నక్క.

కుందేలు పిల్లకు ఏమీ చేయాలో తోచక దాని బారినుండి బయట బడాలని ఒక్క ఉదుటున పరుగు లంఘించింది కుందేలు పిల్ల. అంతలో నక్క తేరుకొని దాన్ని పట్టు కోవడానికి పరుగెత్తడం ప్రారంబించింది. ఇలా పరుగెత్తి పోయే మార్గమధ్యలో వేటగాడు వేసిన వలలో చిక్కుకొని గిలగిల కొట్టుకుంటూ "నన్ను రక్షించండి... నన్ను రక్షించండి" అంటూ అరుస్తుంది నక్క.

దానిని గమనించిన కుందేలు పిల్లకు జాలి కలిగి దాని మిత్రుడు ఐన చిట్టెలుక వద్దకు పోయి జరిగిన విషయం చెప్పి దానిని ఎలాగైనా రక్షించమని కోరింది. మొదట ఒప్పుకోక పోయిన తన స్నేహం మీద గౌరవంతో వలను కొరికి వలలో చిక్కుకొన్న నక్కను కాపాడింది. తాను చేసిన పనికి సిగ్గు పడి నక్క కుందేలు పిల్లకు క్షమాపణ చెప్పి జాగ్రత్తగా తన తల్లికి ఒప్ప చెప్పి చేసిన తప్పుకు చింతిస్తూ అక్కడి నుండి వెళ్లి పోయింది.

నీతి: శత్రువైన కాపాడమని కోరినప్పుడు కాపాడడం మన ధర్మం

" తెలుగుభాషాదినోత్సవం "

గిడుగురామ్మూర్తి ఇల జన్మదినము

వ్యావహారిక భాషకు శుభదినము

తెలుగోళ్లకు భువిలో పర్వదినము

చూడచక్కని తెలుగు సున్నితంబు!

గురజాడ, గిడుగు అందరి త్యాగము

తెలుగువారు చేసిన పుణ్యఫలము

వాస్తవమే! పూర్వజన్మ సుకృతము

చూడచక్కని తెలుగు సున్నితంబు!

ఎన్నో ఉద్యమాలు చేసినారు

త్యాగాలతో అసువు పోసినారు

రచనలతో అందము తెచ్చినారు

చూడచక్కని తెలుగు సున్నితంబు!

వ్యావహారిక భాష అతిమధురము

ధరలో పరిమళించు పూలవనము

పసిపాప చిరునవ్వులా అందము

చూడచక్కని తెలుగు సున్నితంబు!

మాతృభాష పరిరక్షణ బాధ్యత

అభివృద్ధి చేయాలోయ్ అంచేత

వీడాలి అందరు ఉదాసీనత

చూడచక్కని తెలుగు సున్నితంబు!

-గద్వాల సోమన్న

హృదయ కాలేయం

పిడికెడంత హృదయానికి

సంవేదనలు ఎన్నని?

మనసు మురిసినా,

బాధతో ముక్కలైనా,

బరువెక్కి భారమవుతూనే ఉంటుంది.

స్పందనలతో తల్లడిల్లి,

సంతోషాలతో ఉబ్బితబ్బిబ్బై,

నిరంతర సజీవ రాగాలు

పలుకుతూనే ఉంటుంది.

పరిమళాలు వెదజల్లుతూనే ఉంటుంది.

ఇష్టం కాని బందీ కావడం నచ్చని స్వేచ్ఛా సముద్రమది.

ఉవ్వెత్తున అలలు ఎగిసినా,

ప్రశాంతంగా సాగిపోయినా,

స్థితప్రజ్ఞత గల జీవమది.

అణచివేసినా,అడ్డంకులు కల్పించినా,

అలుపెరుగని స్పందనల అమృమది.

హృదయ కాలేయం స్వేచ్ఛనే కాంక్షిస్తుంది.

-డా.రామక కృష్ణమూర్తి,

బోయినపల్లి, మేడ్చల్.

రాఖీ పండగ పర్వదినం

బంధాలను బలోపేతం చేసే అనుబంధం

ప్రేమను పంచే అనురాగం

ఆత్మీయత పంచే మమకారం..

అన్నీ కలగలిసిన అపురూప పర్వం "రక్షాబంధనం".

తొడబుట్టిన వారిని దగ్గర చేసే పర్వదినం..

అన్నచెల్లెల్ల అక్కతమ్ముళ్ల మధ్య

ప్రేమ-ఆప్యాయతలు పంచే శుభదినం.

సోదరులు చేపట్టే ప్రతి సత్కార్యం

సాధించాలి విజయం అని కోరుతూ

గుర్తుగా కట్టే రాఖీబంధనం సోదర సోదరిల మధ్య

ముడిపడిన బంధంను గుర్తుచేయు పర్వం.

సోదరసోదరీమణుల మధ్య

జరుపుకునే ఈ పర్వదినం

గుర్తుగా రాఖీని కట్టి రక్షణ

కల్పించమనితెలిపేసందర్భం

అనురాగం ఆప్యాయత కలబోసిన

ఈరాఖీ పర్వదినం

ప్రతి ఇంటా వెల్లి విరియాలి ఆనందం..!

శుభములనిస్తూ కలగాలి సంతోషం..!!

- ఎన్. రాజేష్,ఎమ్మెస్సి,

కవి,జర్నలిస్ట్, హైదరాబాద్.

భువిపై నవస్వర్గం

ప్రాణవాయువుకు చెట్టు కొమ్మలే

పట్టుగొమ్మలని గ్రహించు

అడుగడుగునా మొక్కల్ని పెంచుదాం

అవని అంతా హరితమయం చేద్దాం

నాటిన ప్రతి మొక్కను వృక్షంగా చూద్దాం

నీరు పోసి ఎదిగేవరకు రక్షణనిద్దాం

మొక్కమొక్కకు నీ రెక్కల కష్టం

కావాలి ఎరువు

ఎదిగే మొక్క తరువై తీర్చాలి

నీ బతుకు బరువు

హరితహారం కావాలి అవనికి ఆసరా

జనజీవన స్రవంతికి భరోసా

మొక్కమొక్కలో ప్రాణం ఉందని తెలుసుకో

నీ ప్రాణానికి ప్రాణవాయువు ఇచ్చేదే

నువ్వు పెంచిన తరువు

పంటపొలాలతో పురుడోసుకోవాలి అవని

హరితంతో ముదమందాలి జన జీవనం

నీ ఆశ శ్వాస హరితం కావాలి

ఆనందమయ జీవితానికి నాంది కావాలి

భవితకు చేతనైన చేయూతనందించు

ప్రాణికోటికి ప్రాణవాయువును పంచు

భువిపై " నవస్వర్గాన్ని " నిర్మించు

చేయీ చేయీ కలుపుదాం

రేపటి తరాలని నిలుపుదాం

పచ్చని మొక్కలతో అవని పులకించాలి

అణువణువు ఆనందసంద్రమై పలకరించాలి

ధరణి దశదిశలా హరితమయమై మెరవాలి

- వీ.వీ.ప్రసాదరావు ( చైతన్య )

ఇంగ్లిష్ లెక్చరర్, కాకతీయ డిగ్రీ కాలేజ్, సత్తుపల్లి, ఖమ్మం జిల్లా.

కాలం విలువ తెలుసుకో

కాలం చాలా విలువైనది

గడిచిన కాలం తీసుకు రాలేనిది

కాలం విలువ తెలుడుకోవలసినది

తెలుసుకొని బతుకు గడపవలసింది

క్షణ కాలం విలువ పరుగు పందెం లో

తృటిలో పతకం పోయిన వారిని అడిగి తెలుసుకో

సకాలం లో బస్ ని మిస్ అయ్యి

ఉద్యోగం కోల్పోయిన వారిని అడిగి తెలుసుకో

సకాలం లో పరీక్ష కు హాజరు కాక

విద్యా సంవత్సరాన్ని

కోల్పోయిన వారిని అడిగి తెలుసుకో

సకాలంలో వైద్యం అందించక

ప్రాణం కోల్పోయిన వారి

కుటుంబ సభ్యులను అడిగి తెలుసుకో

సకాలంలో వర్షాలు కురియకపోతే

పంటలు పండకపోయిన భాద

రైతన్నలు అడిగి తెలుసుకో

సమయానికి ఉద్యోగం రాక

నిరుద్యోగులుగా ఉన్నవారిని అడిగి తెలుసుకో

ఉన్న వయసు లో సాధించడానికి

నిర్లక్ష్యం చేసి వయసు దాటిపోయి

భాద పడుతున్న బాధితులను అడిగి తెలుసుకో

తెలుసుకో కాలం విలువ తెలుసుకో

తెలుసుకో నిన్ను నువ్వు తెలుసుకో

కాలాన్ని సద్వినియోగం చేరుకోవడం తెలుసుకో

కాలం తో పోటి పడి విజయ తీరాలకు చేరుకో

-పసుమర్తి నాగేశ్వరరావు,

టీచర్, సాలూరు, విజయనగరం జిల్లా, 9441530829.

నేటి యువత

సంప్రదాయం సంస్కృతి

యెరిగినా యువతరం

అయినా భ్రష్టు పట్టిస్తున్నది

మన భారతీయ తత్వం

చిరిగిన వలువలతో

తరిగిస్తున్న విలువలు

జీరో సైజు లకై పరుగులు

వేలకు వేల చదివింపులు

అధునాతన భవనంలో

మేకప్పు లతో మెరుగులు

అంగాంగ ప్రదర్శన కై ఆరాటం

పాశ్శత్ఠ్య పోకడకై పోరాటం

పైకే వెలుగు జీలుగుల జీవితం

చూస్తే ఏముంది అరువుల మయం

సాటి మనిషికై ప్రేమానురాగాలు కరువు

పాపపు మోతాదు రోజురోజుకీ పెరుగు

అన్నింటా దిగజారుడుతనం

ఆవిరవుతున్న మానవత్వం

నిండిపోయి న సంకుచితత్వం

బావురు మంటున్న బందం

మాయామశ్చింద్ర లోకం

స్వార్థపు కంపులో బతుకు నిత్యం

అందరు ఉన్నా దేనికో ఒంటరితనం

అహంకారమే నీ ఆయుధం

ఓ యువత మార్చుకో

ఈ జీవన విధానం తెలుసుకొ

నీ భరతమాత గొప్పతనం

చదువుకొని మసలుకో

రామాయణ బారత బాగవతం

నీ జీవన మనుగడే

నీ తర్వాతి తరానికి బాసట

ఎప్పుడు ఉండు ఉదాహరణ గా

విదేశీయులు నిన్ను చూసి నేర్చుకోనుగా

బారతమాత ముద్దు బిడ్డవై

నిలుపు నీ ఖ్యాతి శిఖరానా

సాంప్రదాయ సంస్కృతి కి నువ్వు సాక్షిగా….

-ఐశ్వర్య రెడ్డి గంట

వందేమాతరం, ఏమైపోతోంది ఈ తరం!

మత విద్వేషాల జ్వాలలతో రగిలిపోతోంది ఈ తరం,

కుల జాడ్యాల కుడ్యాలతో అంతరాలను

సృష్టించుకుంటోంది ఈ తరం,

వందేమాతరం, ఏమైపోతోంది ఈ తరం!

ప్రాంతాల సరిహద్దుల గుద్దులాటలతో పొద్దు పోనిచ్చుకుంటోంది ఈ తరం,

నదీ జలాల వాటాల కోసం

పానీపట్టు యుద్ధాలు చేస్తోంది ఈ తరం,

వందేమాతరం, ఏమైపోతోంది ఈ తరం!

అంచనాలకందని లంచాలను దోచుకొంటూ

బతుకుతోంది ఈ తరం,

పంచన చేరిన వారినే అరాచకంగా వంచన చేసి,

మంచిని మరచిపోతోంది ఈ తరం,

వందేమాతరం, ఏమైపోతోంది ఈ తరం!

అత్యాచారాల ఆచారాలతో అట్టడుగు పోతోంది ఈ తరం,

నికృత్యాల వికృత చేష్టలతో భ్రస్టు పట్టిపోతోంది ఈ తరం,

వందేమాతరం, ఏమైపోతోంది ఈ తరం!

కడుపు నింపుకోవడానికి

కడుపున పుట్టిన బిడ్డలను అమ్ముకుంటోంది ఈ తరం,

కాటికి కాలుచాచిన కన్నవాళ్ళని

వృద్ధాశ్రమానికి చేరుస్తోంది ఈ తరం,

వందేమాతరం, ఏమైపోతోంది ఈ తరం!

----కొత్తపల్లి రవి కుమార్,

రాజమహేంద్రవరం,

9491804844.

ప్రక్రియ: సున్నితం

రూపకర్త: శ్రీమతి నెల్లుట్ల సునీత గారు

౧)

శాస్త్రీయదృక్పథం లోపించిన కారణంగా

మనలో పాదుకునే మూఢనమ్మకాలు

అజ్ఞానం అవిద్యలే ముఖ్యకారణాలు