మూఢత్వ గొలుసుతో...
దేశ కాల పరిస్థితులు ఏవైనా...
చిక్కని మూఢత్వగొలుసు
మనుషుల చుట్టూ బిగిసిపోతూ..
సమాజం విస్తుపోయేలా,
సంబంధీకుల సర్వ శక్తులనీ
పీల్చేస్తూ...
సంయమనం ఊసే లేదిక్కడ!
విడిదీయబోయే చిక్కులే...
మరింత ముడులు పడేసిన
మూర్ఖత్వ బలిమి!
దశాబ్దాలుగా మార్పులేని చోట
ఏ నీతిసూత్రం ఫినాయిలూ వదిలించబోని మురికి
విద్యావంతుల బుర్రలో సైతం
అశాస్త్రీయ వల్మీకపువరసలు
స్పష్టంగా వినపడే అవినీతి బుసలూ...,
కోర్కెల జడివానలో కుప్పకూలే యువత
దేశంలో భావితరాలకు ఏ సందేశం ఇస్తారో...
చేష్టలుడిగిన కుహనా మేధావులు!?
అనేక జీవితవిస్మయాలతో
అతలాకుతలమయ్యే
హృదయాల దీన ఘోష!
ఓ దైవమా..
అదృశ్య శక్తివై, మార్పుతీసుకొనిరా!
మా దిక్కుతోచనితనాన్ని
అవతలి వారిలో జవజీవాల్ని హరించే..
ప్రవర్తనల జడ్డితనాన్ని వదిలిస్తూ...,
నీ పరిపూర్ణ శాంతిమయ ధృక్కులతో
హాయినివ్వు తండ్రీ!!
✍️ఎం. వి. ఉమాదేవి
నెల్లూరు.