ఓట్లు పొందగోరి ప్రజకు నోట్లుపంచి
మద్యపానంబునన్ ముంచి మాయచేసి
దుష్టులౌ నాయకుల్ బహు దోషములను
జేయు చుందురు హీనులై సిగ్గు! సిగ్గు!/
ఉచిత పథకంబులని జెప్పి యుబ్బవేసి
బొబ్బ వెట్టుచు ప్రజలను మోసపుచ్చి
గద్దె నెక్కిన పిమ్మట ఘనముగాను
పాలకులురారొకరుకూడ ప్రజల కడకు!/
లంచ గొండులై నిత్యము వంచనమెయి
దోచుకొందురీ ప్రజలను దొంగలవలె
నీతి ధర్మముల్ దప్పిన నేతలిపుడు
రాజ్య మేలుచుండగరాదు రాదుశాంతి./
ప్రజలు చైతన్య వంతులై వరలుచుండి
శాంతి సౌఖ్యముల్ కోరుచు జాతికొఱకె
యోటు వజ్రాయుధముకేల నొడిసిపట్టి
తఱుమవలయునీదుష్టంపుదండునిపుడు.//
జాతి మనుగడ కోసమై జనముకదిలి
సజ్జనాళిని గుర్తించి శ్రద్ధపట్టి
యోట్లు వేయుచు గెలిపించి నుత్తములకు
పట్టమున్ గట్టి నిల్పిన ప్రగతి కలుగు.//